近排好多朋友仔已經喺新冠狀病毒病中好返，但係唔少嘅康復者都出現唔同嘅後遺症，有啲就突然之間好攰，有一啲就突然之間諗唔到嘢、發現得最多嘅就係睡眠出現問題同埋胃酸倒流，今日就同大家詳細講解每種後遺症係點形成，同埋點樣可以改善。
1.無原因下疲倦
其實同缺乏鐵質嘅症狀好相似，都係身體因為含氧量不足引致。所以我地會建議大家多啲食高鐵質嘅食物、例如紅肉、海鮮同埋紫菜。
另外，補充足夠嘅奧米茄三脂肪酸能夠幫助身體消炎及減低身體嘅發炎反應，令到我地冇咁易攰！
最後，要補充足夠嘅蛋白質令身體可以製造返多啲血細胞
2.記憶力同專注力變差
對抗新冠病毒嘅時候，免疫力使用大量嘅維他命B 12去提升身體防禦能力，加上患病期間冇適當補充嘅話，有機會令身體嘅維他命B 12不足，短期會引致記憶力同埋專注力暫時變差。但係唔使擔心，只要適當補充番足夠嘅海鮮類食物同埋蛋，就可以吸收返維他命B 12！
3.失眠
鎂質參與好多唔同嘅免疫力反應。其中一種就係呼吸道嘅抗炎反應，喺感染期間，免疫力細胞使用咗好多鎂質去進行唔同嘅消炎同埋免疫力反應，從而減低我哋呼吸道嘅病徵。長時間冇足夠補充，會令到神經系統缺乏足夠嘅鎂質幫助我哋進入放鬆狀態，造成失眠！
*多啲食菠菜、南瓜籽、吞拿魚等鎂質豐富嘅食物可以放鬆神經，訓覺都訓得好啲！*
4.脫髮
身體流失過多蛋白質、鐵質同埋維他命B群，都會引致脫髮，及時補充優質蛋白質嘅話可以改善脫髮問題。
5.抵抗力下降
染疫後， 維他命D濃度有機會下降。維他命D除咗幫助我地提升骨格健康之外，仲可以幫助我地調節肺部免疫力。所以如果康復者未及時補充維他命D嘅話，有機會減弱免疫力！加上患病關係，近排大家少玩戶外活動，更加難靠曬太陽幫助身體自行製造維他命D。
*除左曬太陽之外，食多啲三文魚、菇菌類同黃豆類食物都可以補充大量維他命D，盡快幫身體恢復免疫力！*
6.食欲不振及腸胃不適
染疫後，好多朋友都發現腸胃功能會有混亂情況，例如胃酸倒流、肚瀉等。
只要補充足夠益生菌，就可以改善到腸胃功能紊亂，特別係要補充足夠嘅雙歧桿菌！
