依個星期真係凍咗好多，我都要開始着大褸啦！
近排好多朋友都WhatsApp我同我哋報告，佢哋開始出現皮膚敏感、氣管敏感、咳嗽同埋出蕁麻疹！
原來轉天氣嘅時候我哋個免疫力係會短暫出現一啲免疫力低下問題原因係：
低溫加上乾燥天氣會容易令到呼吸道黏膜變得單薄，令到病原體更加容易攻擊我哋，如果你有敏感體質嘅話會令到致敏源更加容易觸發氣管敏感！
教大家幾個方法可以喺轉天氣嘅時候提升一下免疫力預防敏感
1.補充足夠水份
水份可以幫助提升身體免疫力細胞活性、幫助帶走水溶性毒素同埋可以防止身體黏膜變得乾燥。毒素累積少咗自然冇咁容易出現敏感啦！
補水貼士：-每1小時最少飲到250毫升水份直到2-2.2L
2.記得食飯
天氣開始轉冷嘅時候，我都會同大家講就係夜晚未必需要跟特殊餐，因為天氣溫度驟降嘅話，身體需要更加多嘅能量去維持體溫、如果我哋食唔夠澱粉質，我哋嘅免疫力就好難再維持，所以大家唔使怕會影響體重管理，可以補充適量嘅澱粉質！
食飯貼士：平時如果跟緊體重管理餐單，夜晚不妨加半碗白飯配合80至到150克豬肉補充鐵質，可以維持夜間免疫力。3. 維他命D 補多D
開始步入冬季，我哋接觸陽光時間會慢慢減少，維他命D除咗幫助我哋提升骨骼密度之餘，佢仲可以幫助我哋提升呼吸道免疫力，佢可以促進我哋免疫力細胞更加快咁樣去搵到病原體如果平時大家唔可以曬太多陽光嘅話，可以嘗試喺餐單底下加入多少少三文魚、大啡菇、芝士、牛奶同埋豬肉
4.每日一個啤梨或者紅蘋果
好多人去到冬天就唔想食水果，因為怕凍，但係其實有足夠嘅水溶性纖維可以幫助到我哋降低腸胃嘅毒素，除咗蘋果以外, 啤梨你都係一個高水溶性纖維嘅水果，可以幫助身體移除腸胃毒素！
水果貼士：晚餐前完成所有水果進食，因為轉季嘅時候好容易出現胃酸倒流，所以晚餐之後再食水果會加劇胃酸倒流情況！
