好多人都覺得薯餅好高油，其實改變個做法嘅話都可以係其中一種可以取代麵包嘅食物！最重要係冇Gluten ! 【材料】 2個薯仔 1條紅蘿蔔 2隻雞蛋 半個牛油果 【做法】 1.薯仔同紅蘿蔔去皮 2.用刨絲器將紅蘿蔔同薯仔切絲 3.避免薯仔氧化，建議先放入水中浸泡 4.薯仔絲撈起印乾，預熱平底鑊 5. 將薯仔絲放入平底鑊中慢炒5分鐘，直到乾身 6. 放涼後加入紅蘿蔔同一隻雞蛋拌勻，輕輕用鹽同胡椒調味 7. 預熱平底鑊加入油，中火加入薯仔紅蘿蔔絲混合物，用鑊鏟壓成圓形，每一面大概煎8分鐘 8. 完成後，薯餅放涼 9. 平底鑊煎一隻蛋 10. 牛油果切成片狀 11. 將薯餅牛油果同埋雞蛋合體 12. 完成！

近排都好多朋友陸陸續續去旅行，有啲已經返咗嚟香港，好多時都會WhatsApp我問有冇啲急救嘅方法，但係大家唔使咁驚，去完旅行之後抖順條氣先，有足夠休息之後再磅下自己xD，睇吓有冇帶咗啲「手信」返嚟先決定使唔使急救，如果冇嘅話咁就照常回覆平時嘅飲食習慣就可以，但係真係發現「手信」真係跟咗你返嚟嘅話，就可以參考以下急救餐單！ 旅行後出事原因 便秘：短時間改變飲食習慣、水質、水果蔬菜進食分量少咗都會令到身體出現便秘問題，依家研究指出宿便可以佔據身體4kg 餐單解決方法：改用容易消化蛋白質加上足夠水溶性纖維幫助清除腸胃宿便 食足晒豐富三餐：無可避免去旅行一定食足三餐，基本上我都唔會叫你哋控制咁多 餐單解決方法：輕量降低碳水化合物含量，以低碳水化合物食物取代常見主要澱粉質 水腫：搭長途飛機、長途車同飲食鹽份太多都會令到身體水腫。 餐單解決方法：以青檸檬水和高蛋白食物排水出多餘水份！ 餐單備註： *半個青蘋果和半個啤梨加水用攪拌機打成果蓉 **烹調方法只需要按平時進食習慣，如份量不夠，可以提升，可以於午餐和晚餐中加入少許無麩質嘅零食 ***如果三日後體重回復正常，可以回復正常飲食。 ****餐單只供參考，請先留意現時份量和餐單分量有否太大出入才嘗試執行，如果有任何長期疾病例如糖尿病或正在接受藥物治療，請諮詢專業人士意見才進行以上餐單。

[比乳酪更有益的超級食物] 💁🏻‍♂️克菲爾一詞是源於東歐地區對發酵乳製品的稱呼 💁🏻‍♂️它的質感比乳酪更液體，適合加入水果和穀物脆片作為甜品享用，亦可代替乳酪製作果昔Smoothie😋 💁🏻‍♂️製作克菲爾需要奶🥛和益生菌🦠。除了牛奶，植物奶如豆奶、杏仁奶等亦能製作克菲爾飲料，所以亦適合乳糖不耐症的人食用！ 🌟當中添加的益生菌有：除了大眾較熟悉的乳酸菌和雙歧桿菌外，還添加了酵母菌。酵母菌在發酵的過程中會產生維他命B群和葉酸，菌株可達12種或以上，而普通乳酪約含2-6種菌株。 🌟克菲爾每次發酵可製造達15-20億CFU/mL的菌落數量，相對傳統乳酪只含約6 CFU/mL的菌落數量高3倍！   😯一般超市可以買到嗎？沒見過！🤨 ✅其實在一些大型超市都可以找到，通常與乳酪等奶類製品放置在雪櫃中，包裝上列有「kefir」一詞就是克菲爾了！ 🔅克菲爾飲料通常會比普通乳酪的價錢高一些，主要因為生產過程需要加入多元益生菌發酵，所以成本會較普通乳酪稍高 💁🏻‍♂️不過，你知道可以在家中輕鬆製作Kefir嗎？ 🌟一些烘培店或網店都有售賣Kefir菌粒或kefir粉，只需要根據包裝上的指示，在室溫（夏天）下將菌種倒入室溫牛奶中，再發酵8-24小時，就能成功製作滿滿益生菌的kefir！ 🌟發酵後的kefir表面或底部會有一些較大的顆粒，它們就是多元益生菌。用乾淨的鐵匙羹挖出顆粒，再放入新鮮的牛奶中，就能不斷製作kefir了！低成本而且方便快捷！

好多人都知道澳洲盛產嘅係蜂蜜，好多時買蜂蜜嘅時候你會見到佢會寫住麥盧卡350+，其實點解要有唔同嘅+呢，同埋越多係唔係越好，今日同大家講吓！ 麥盧卡蜂蜜係由蜜蜂喺麥盧卡花採集花蜜後製造出嚟嘅蜜糖，佢嘅歷史好悠久，因為佢係澳洲同埋新西蘭傳統嘅醫療嘅一個部份，可以用來治療胃部不適、皮膚潰瘍同埋其他創傷。 後來科學家發現麥盧卡蜂蜜有一隻嘅活性抗菌成份甲基乙二醛（Methylglyoxal，MGO），之後廠商就用MGO 濃度去為唔同嘅蜂蜜分類，因為濃度越高即係代表入邊嘅活性成分、消炎成份同埋抗菌性就越高，呢一個嘅分類等級可以等大家購買嘅時候可以按自己嘅需求購買麥盧卡蜜糖！ 濃度越高即係入邊嘅活性成份同埋抗菌性就越強，即係佢對身體嘅治療性就越高 以下我簡單總結唔同等級嘅麥盧卡蜜糖究竟要點樣選擇： MGO 分類 100-250+: 維持日常免疫力同埋幫助皮膚消炎。 300-550+：可以幫助改善上呼吸道病徵例如喉嚨痛和咳嗽；改善消化不良。 800-1200+：改善口腔潰瘍同皮膚傷口。 (MGO以外仲有其他濃度標準，我喺留言度俾個表格大家去換算) 所以大家購買麥盧卡蜜糖嘅時候，如果佢嘅真身上面有+即係除咗可以當日常調味使用以外，佢仲有一定嘅自然治療作用！

大家都有發現我去咗搖籃山(Cradle Mountain)行咗幾個鐘頭山，澳洲嘅陽光比香港更加猛烈，如果一個唔小心嘅話，都好容易曬傷皮膚！ 除咗做足防曬之餘，原來有啲食物都可以幫助到我哋護膚，今日同大家講四種護膚美白食物。 1.蕃茄 蕃茄有豐富維他命C和茄紅素，可以幫助皮膚中和紫外線破壞皮膚後製造嘅自由基同埋提升膠原蛋白製造，令到皮膚變的更加緊致！ 小貼士：蕃茄紅素需要加入少許油同埋熱力烹調先可以釋放出來！ 2.牛油果 澳洲最出名嘅牛油果大家都知，除咗可以幫助叫我預防心血管疾病以外，牛油果入邊嘅維他命E都係一個好強勁嘅抗氧化劑可以愛嚟幫助保護皮膚免受自由基傷害，有研究指適量補充維他命E可以減低黑色素沉澱！ 3.綠茶 兒茶素係天然嘅皮膚防曬，可以幫助我哋對抗紫外線嘅傷害，另外用完既綠茶茶包呼喺黑眼圈位置，可以改善黑眼圈 *如果對綠茶或者茶有敏感，請勿直接使用茶包於臉上* 4.三文魚 三文魚有豐富維他命D，除咗可以提升骨格密度之餘，皮膚如果有足夠維他命D，可以減低紫外線對皮膚嘅直接傷害，仲可以防止皮膚變得暗雅同埋變黑！ 又到左秋天，大家計劃戶外活動嘅時候記住要做足防曬準備，唔好返到屋企之後黑咗幾度！

[𢲷到損曬好辛苦😵😵‍💫] 又到轉季的時候，秋天🍁來臨，有很多讀者都會有皮膚敏感、痕癢甚至脫皮的問題。除了口服敏感藥和藥膏外，身體都需要以下營養修復細胞及抗發炎！   1. 抗炎的好油脂 平常有看我們Facebook Page都應該會知道Omega 3經常出現在我們的貼文中。難道Omega 3真的這麼萬能嗎？   皮膚產生過敏反應，除了是因為天氣轉變、氣壓、接觸四周的致敏源外，有機會因為身體細胞發炎引致。Omega 3和omega 9能夠保護皮膚屏障，亦能抵抗發炎因子及增強免疫系統，減少因發炎引致的皮膚問題。   2. 「見字飲水」🧊 想皮膚保持水潤，就需要有充足的水份！細胞修復及生長需要使用大量水份，若身體長期缺水，皮膚敏感問題有機會難以好轉。不過，飲水都有技巧，並非飲越多越好。 -一次過大量喝水會令身體難以吸收及加快排走水分，令排尿次數增加🤢 -建議一小時內飲用不超過250毫升的水，慢慢飲可以令身體更容易吸水🙌🏻 -覺得喝開水太寡的可以加片檸檬增加風味。以淡茶或草本茶代替一部分飲水量亦可。 -進食水份含量高的生果如哈密瓜🍈、水晶梨🍐都可以額外補充水分！🙌🏻   除了以上兩種營養，以下這種食品好多人都不知道會加劇皮膚過敏反應！   3. 減少進食小麥類食品 小麥類食品含麩質蛋白，因為人體腸道內的酵素較難完全消化麩質蛋白，會引致敏感及發炎問題，亦影響皮膚健康，有機會引發濕疹、發紅痕癢等。 -一星期不多於二至三次進食讓身體慢慢消化麩質蛋白及修復炎症 ⚠️常見食物種類： 烘培類含麵粉的食物 意粉🍝 麵包類及Pizza🍞🍕 即食麵、拉麵🍜

10月尾係萬聖節大家都知，萬聖節有個主角就係南瓜，喺澳洲差唔多10月嘅時候就會見到好大個嘅南瓜，好多人都會買返屋企做裝飾，但係南瓜其實係其中一種超級食物！ 豐富抗氧化劑或可幫助抗癌 – 南瓜有維他命A、E和　C同埋硒 以上都係豐富嘅抗氧化劑，可以幫助身體對抗會破壞器官嘅自由基同埋可以幫助預防肺癌、子宮癌、乳癌、大腸癌、食道癌等！因為入邊嘅活性成份可以抑制癌細胞生長。 改善血糖水平 – 南瓜入邊嘅水溶性纖維可以減慢糖分吸收，另外南瓜入邊嘅礦物質可以提升胰島素敏感程度，令到血糖波幅減低！ 幫助提升視力和改善眼乾 – 南瓜入面有好豐富嘅胡蘿蔔素、鐵質可以幫助預防眼乾同埋改善視力

好多平時有複診嘅朋友都知道我10月要去澳洲玩10日，有疫情開始之後其實都冇離開過香港，好彩護照仲未過期 大家知唔知如果坐長途機嘅時候有咩營養要留意？ 1. 上機前3小時 避免進食過量精製澱粉，防止血糖波幅引致搭飛機時出現突然飢餓情況 進食2至3份複合性澱粉（藜麥、紅米或意大利粉) 以蛋白質為主食（可以食雞扒、魚扒或者豆腐 2. 在飛機途中 避免飲用梳打水、西蘭花、椰菜花和蘋果，因為機艙壓力較低，我哋腸胃中嘅氣體會較容易膨脹，好容易引致有胃氣脹或者胃部不適問題 可以選用橙或香蕉去補充鉀質防止抽筋 飲用足夠水份和避免飲酒，在機艙中，身體流失水份比在陸地快。所以我們需要有足夠水份防止皮膚和呼吸道變得乾燥 3. 落飛機之後 可以補充電解水、香蕉或者朱古力去補充糖分同埋鉀質，從而舒緩疲勞

上星期整咗個極低脂肪嘅雞肉熱狗腸，材料極度簡單只係需要雞胸肉、薯仔同埋紅蘿蔔， 10分鐘就可以做到！ 整好之後仲可以放喺冰箱，有需要食嘅時候拎出嚟煎香佢！ 材料 2片雞胸肉 1/2個中型薯仔 1/2條紅蘿蔔 調味料 少許鹽、黑胡椒同埋料理酒 1. 薯仔紅蘿蔔切片中火蒸5分鐘 2. 將雞胸肉油脂移除 3. 雞胸肉切粒加入少許鹽胡椒料理酒調味 4. 把雞胸肉加入料理機中打成膠狀 5. 把薯仔紅蘿蔔加入再打1分鐘 6. 把雞肉膠加入一個廚房膠袋中，把雞肉膠推到膠袋角中 7. 預備一張A4 SIZE 錫紙 8. 把膠袋角煎開一個大洞，把雞膠唧到錫紙上(好似香腸咁) 9. 剪開錫紙，好似包糖果咁用錫紙包裹好雞肉腸 10. 在蒸爐中把雞肉腸 蒸 10 分鐘 11. 放涼後可以煎香食用 12. 完成！

上兩個禮拜講咗，原來豆類都有唔同嘅用法，好多人都問我咁樣瓜類呢？ 其實吾同瓜類嘅蔬果營養價值都有唔同㗎，今日同大家簡單分類，等大家去買餸嘅時候方便啲啦！ 我哋平時食開嘅瓜類蔬果可以分為蔬菜類、糖類同埋澱粉類 蔬菜類 好似翠玉瓜、合掌瓜，佢嘅卡路里同糖份都比較低，但係佢嘅纖維含量相對較高，所以可以用佢嚟取代平時食開嘅蔬菜。 糖類 即係佢嘅糖分含量比較高但係佢嘅纖維含量比較低，適合將佢用嚟代替水果，但係要注意就係有糖尿病嘅病人盡量都唔好食佢哋當係水果啊，因為普遍佢哋嘅升糖指數都比較高。 澱粉類 依個種類淨係得南瓜，南瓜係一個成日會見到嘅高澱粉質蔬菜，可以代替白飯作為我哋嘅主食！